Analu Vettaku Nannu Namtesi Neevu (ఆనలు వెట్టకు నన్ను నంతేసి నీవు)

ఆనలు వెట్టకు నన్ను నంతేసి నీవు
కానీలే నీ మతి నింత గలిగితేనే చాలును        ॥ పల్లవి ॥

నీ మాట నీకు వచ్చెనె నిన్నేమీ ననలేను
ఆ మీఁదటిపను లిట్టే ఆడవలెనా
కామించి నేఁ బదరితే కక్కూరితిదాన నౌదు
యీ మెలఁత లిద్దరును యెఱిఁ గుంటెఁ జాలును  ॥ ఆనలు ॥

నిన్ను నే మెప్పించితిని నే నే మంచిదాన నైతి
సన్నలవలపు నీపైఁ జల్లవలెనా
నన్ను నేనే మెచ్చుకొంటే నగుఁబాటుదాన నౌదు
నిన్న నేఁటి పంతములు నిలిచితేఁ జాలునూ    ॥ ఆనలు ॥

నీవే నన్నుఁ గూడితివి నీ కౌఁగిట నున్నదాన
యీ వేళనే మోవితేనె యియ్యవలెనా
శ్రీ వేంకటేశ నిన్నుఁ జెనకితే గబ్బి నౌదు
యీ విధాన నా పొందు నీ కిత వైతేఁ జాలునూ.    ॥ ఆనలు ॥