Adugare Yeesuddi Atanine Chelulaala (అడుగరే యీసుద్ది అతనినే చెలులాల)

అడుగరే యీ సుద్ది ఆతనినే చెలులాల
చిడిముడిఁ జెప్పినట్టు సేసేఁ గాని        ॥ పల్లవి ॥

కొత్త కొత్త విన్నపాలు కోరి వేఁడిఁ జేయఁగాను
చిత్త మెట్టుండునొకా చెలువునికి
బత్తి తోడ సారె సారెఁ బాదాలు విసుకఁగాను
తత్తరపు గోళ్ళేడఁదాకునో తనకు        ॥ అడుగ ॥

యెగ్గెఱఁగక సేవనే నిందరిలోఁ జేయఁగాను
సిగ్గులెంత నిండునొకా చేరి పతికి
వొగ్గి యే పొద్దునుఁ దనవొద్దఁ గాచుకుండఁగాను
వెగ్గళించరాక యెంత వేసటొకొ తనకు     ॥ అడుగ ॥

గట్టి నా గుబ్బల నొత్తి కరఁగించఁగాను పంత
మెట్టొకా శ్రీ వేంకటేశ్వరునికి
యిట్టే తా నన్నుఁగూడె యింకా నేఁగొసరఁగా
రెట్టించి తమకములు రేఁగునొకా తనకు    ॥ అడుగ ॥