Adigaaka Nijamatam Badigaaka (అదిగాక నిజమతం బదిగాక)

అదిగాక నిజమతం బదిగాక యాజకం-
బదిగాక హృదయసుఖ మదిగాక పరము     ॥ పల్లవి ॥

అమలమగు విజ్ఞానమను మహాధ్వరమునకు-
నమరినది సంకల్పమను మహపశువు
ప్రమదమను యూపగంబమున విశసింపించి
విమలేందు యాహుతులు వేల్పంగవలదా    ॥ అది ॥

అరయ నిర్మమకార మాచార్యుఁడై చెలఁగ
వరుసతో ధర్మదేవత బ్రహ్మ గాఁగ
దొరకొన్న శమదమాదులు దానధైర్యభా-
స్వరగుణాదులు విప్రసమితి గావలదా     ॥ అది ॥

తిరువేంకటాచలాధిపునిజధ్యానంబు
నరులకును సోమపానంబు గావలదా
పరగ నాతని కృపాపరిపూర్ణ జలదిలో
నరుహులై యవబృథం బాడంగవలదా    ॥ అది ॥