Ade Chudare (అదె చూడరే)

అదె చూడరే మోహనరూపం
పదిగోట్లుగల భావజరూపం       ॥ పల్లవి ॥

వెలయఁగఁ బదారువేలుమగువలను
అలవమినఘనమోహనరూపం
వలచిననందప్రజముగొల్లెతల
కులుకుఁజూపులకు గురియగురూపం   ॥ అదె ॥

యిందిరావనిత నెప్పుడుఁ దనవుర –
మందునిలిపిన మోహనరూపం
కందువభూసతికాఁగిటిసొంపుల –
విందులు మరిగిన వేడుకరూపం    ॥ అదె ॥

త్రిపురసతుల బోధించిరమించిన
అపురూపపుమోహనరూపం
కపురుల శ్రీవేంకటపతియై యిల
నుపమిఁచగరానివున్నతరూపం     ॥ అదె ॥