Amdarivamtidaananaa Ayyo Tanaku (అందరివంటిదాననా అయ్యో తనకు)

అందరివంటిదాననా అయ్యో తనకు
మందలించి తన సేవే మన్నించీననవే        ॥ పల్లవి ॥

తనపై నేఁ జేసే బత్తి తగ నాకుఁ దోడై వచ్చి
వినయము నాదే నన్ను వెలయించీని
యెనసిన యిచ్చకమే యీడేరించీ నన్ను
కనుఁగొని తన్ను నింత కక్కసించ నేఁటికే       ॥ అందరి ॥

కమ్మి తనకుఁ గట్టిన కంకణమే మేలై వచ్చి
నమ్మిన నమ్మికలె నన్నుఁగాచీని
ఇమ్ముల నా కోరికలే యిట్టే తన్నుఁదోడి తెచ్చి
చిమ్ముచుండను బలిమి సేయవచ్చు నటవే      ॥ అందరి ॥

సొరిది నే వినే తన సుద్దులే ఫల మిచ్చి
బెరసి నా తమకమే పెండ్లి సేసీని
యిరవై శ్రీ వేకంటేశుఁ డింతలోఁ దా నన్నుఁగూడె
సరికి బేసికిఁ దన్ను సాదించఁ దగునా          ॥ అందరి ॥