Amke Vachchinapudannee (అంకె వచ్చినపుడన్నీ)

అంకె వచ్చినపు డన్నీనయ్యీఁ గాక
పొంకము గానియందుకు పోరు గొంత వలెనా    ॥ పల్లవి ॥

మంచిమాటలాడితిఁబో మాపుదాఁకా నీగుణము
చంచలము మాని వోజకు వచ్చీనా
కంచు గంచే పెంచు వెంచే కాలమెంత జరిపినా
పంచనుండి ఇందుకుఁగా బతిమాలవలెనా    ॥ అంకె ॥

చేతులెత్తి మొక్కితిఁబో చిత్తములో నీ ప్రేమ
యీతల నేనెంతన్నా నిఁక వచ్చీనా
యేతులేలా రాయి రాయే యెంతైనా గుల్ల గుల్లే
కాతరాన నిందుకుఁగా కాఁకఁ బొందవలెనా     ॥ అంకె ॥

ఇట్టె నిన్నుఁ గూడితిఁబో యెరవుల నీకాఁగిలి
జట్టినెంతబిగించినా చవి వుట్టీనా
నెట్టిన శ్రీవేంకటేశ నీవె నన్నుఁ గలసితి
వెట్టికి యిందుకుఁగా వేగిరించ వలెనా       ॥ అంకె ॥