Adinatte Yaadaraadu (ఆడినట్టే యాడరాదు)

ఆడినట్టే యాడరాదు ఆపెతో నీవు
వాడికె సరసములే వైపులింతే కొని      ॥ పల్లవి ॥

కోమలి తోడుత నీకుఁ గోపగించుకొనరాదు
యేమేమి మాటలాడినా నెంతదూరినా
కామించి వచ్చినదాపె కైకొని గురియైతివి
దామెన నీనగవులే తగవింతే కాని       ॥ ఆడి ॥

అట్టె చలపట్టరాదు అంగనయడకు నీవు
ఱట్టు నిన్నెంతసేసి యాఱడిఁ బెట్టినా
చుట్టపు వరుస దాపె చొక్కి చనవిచ్చితివి
నిట్ట చూపుల మెచ్చులే నేరుపులు గాని    ॥ ఆడి ॥

జోడువాయనిఁకరాదు సుదతి యింటను నీవు
యీడు యెంత మీరినాను యెలయించునా
వేడుకకతై యాపె శ్రీవేంకటేశుఁడవు నీవు
కూడిన యీకూటములే గుణములు గాని  ॥ ఆడి ॥