Amkeku Raanipanulainapaati (అంకెకు రానిపనులైనపాటి )

అంకెకు రాని పనులైనపాటి చాలును
మంకులు చెల్లవు నిన్ను మరిగినదానను    ॥ పల్లవి ॥

పచరించి నీకు విన్నపములు సేసేవారి
వచనాలలోనే కానవచ్చె వలపు
రచనలు నేరుతుము రాజసాలు నేరుతుము
వుచితముగాకుండఁగా వూరకున్నదానను    ॥ అంకె ॥

సగము మొగము వంచి సన్నలు సేసేవారి
నగవందే అంతా వున్నది నిజము
పగటు నెరుఁగుదుము పంతమూనెరుగుదుము
జగడాలు చేరీనంటా సమ్మతించుకొంటిని    ॥ అంకె ॥

ఆయములు చూపి మోపి అప్పణలిచ్చేవారి
కాయకపు మొక్కులకే కలిగె మేలు
యీయెడ శ్రీ వెంకటేశ యిటు నిన్నుఁ గూడితిని
చేయి మీఁదై నవ్వులకు సెలవు పెట్టితిని    ॥ అంకె ॥