Amtakunopite Jaalunamduku (అంతకునోపితే జాలునందుకు)

అంతకు నోపితేఁ జాలునందుకు నేఁ గాదనేనా
చెంతలనే వూరకున్నఁ జిమ్మిరేఁగుఁ బనులు  ॥ పల్లవి ॥

వొడివట్టి తీసేవు వూరకే యానవెట్టేవు
అడరి నీయింటికి రమ్మనుచు నీవు
వడిగానాడనున్న వారు వాదులడిచితే
గొడవ మానుపలేవు కొద్దిమీరుఁ బనులు    ॥ అంతకు ॥

చెక్కు గడు నొక్కేవు చేతులెత్తి మొక్కేవు
అక్కరఁబొత్తు బోసేతమనుచు నీవు
కక్కసించి నీసతులు కైదప్పు సేయవచ్చితే
చిక్కక నేనే ముందు చేముంతునపుడు    ॥ అంతకు ॥

కన్నులారిచేవు నాకు కాఁగిట బిగించేవు
అన్నిటా నన్ను మన్నించేననుచు నీవు
నన్ను నీవు గూడితివి నగుతా శ్రీవేంకటేశ
మిన్నక నీసతులను మెట్టి యెలఁబడును   ॥ అంతకు ॥