Amdukemi Dosamaa Ataniki Neeku Veraa (అందుకేమి దోసమా ఆతనికి నీకు వేరా)

అందుకేమి దోసమా అతనికి నీకు వేరా
సందడి నాతని రతి సమ్మతించవే     ॥ పల్లవి ॥

మోహముగలుగువారు ముందువెనక లెంచరు
యీహల మొక్కెనంటా నీవేల లోఁగేవే
సాహసములూఁ జేతురు చనవులూఁ జెల్లింతురు
పోహణించి వలపుల భోగించవే       ॥ అందు ॥

తమిగలిగినవారు దండనుండి పాయరు
కొమరెనంటానేల కొంకఁజూచేవే
జమళిఁ జొక్కుదురు ఇచ్చల నవ్వుదురు తాము
చెమట చిత్తడి తోడ చెలరేఁగవే       ॥ అందు ॥

ఆయమెరిఁగినవారు అట్టె కాఁగిలింతురు
చేయివట్టెనంటానేల సిగ్గువడేవే
యీయెడ శ్రీవేంకటేశుఁ డిదె నిన్నుఁ గూడె నేఁడు
చాయలు సేసుక ఇట్టె చనవియ్యవే    ॥ అందు ॥