Adi Neepattapudevu Ladigite Jeppitimi (అది నీపట్టపుదేవు లడిగితే జెప్పితిమి)

అది నీ పట్టపుదేవు లడిగితేఁ జెప్పితిమి
యెదుట నేల దాఁచేవు యెఱిఁగిన పనికి     ॥ పల్లవి ॥

వాలారు గోళ్ళు సోఁక వనితా నీవు సంగడిఁ
గేలుఁ గేలుఁ బెనచుక కేరి నవ్వరా
మేలిమి పొదరింటిలో మీ రిద్దరు నల్లప్పుడు
తాలిమి తోడ నేకతము లాడుకొనరా       ॥ అది ॥

అక్కజపుఁ దమి తోడ నాపే నీవుఁ జెలరేఁగి
చెక్కుఁ జెక్కుఁ జేర్చి వావి చెప్పుకొనరా
మొక్కలానఁ జీఁకటి మూఁక మాఁకులలోన
అక్కరతో సరసము లాడుకొంటా నుండరా    ॥ అది ॥

చిడిముడి నొండొరులు చిగురుఁ బానుపు మీఁద
తొడఁ దొడ నంటఁ గాలు దొక్కుకొనరా
కడు నేఁ డీకెఁ గూడితి గాక శ్రీ వేంకటేశ్వర
యెడయక తొల్లి సేఁతలెల్లాఁ జేసుకొనరా      ॥ అది ॥