Alladivo Cheta Neeku (అల్లదివో చేత నీకు)

అల్లదివో చేత నీకు నప్పగించితి
వల్లెవాటుతోడ నింత వలలఁ బెట్టేదా     ॥ పల్లవి ॥

నిన్నుఁ బాసి విరహన నెగులుతో నున్న సతిఁ
గన్నులఁ జూచి యేమి గట్టుకొంటివి
యెన్నిక రాజము నీ కెంత గలిగిన భూమిఁ
బన్నినయాడువారిపైనే చూపేదా         ॥ అల్ల ॥

పాయము నీకు మీఁదెత్తి పడతి వుండఁగ నీవు
చాయ సేకొని యంత జాణవైతివి
ఆయలే బిరుదుబంటవై మెరసినదెల్ల
రాయడి యింతుల నింత రవ్వసేసేదా     ॥ అల్ల ॥

పిలిచేటినీమీఁది ప్రేమము గలయింతికిఁ
బలుకక యిప్పు డెంతపని సేసితి
నిలిచి శ్రీ వేంకటేశ నేఁడె యాపె గూడితివి
వలచిన వారికే వనమయ్యేదా         ॥ అల్ల ॥