Aaketomaaru Vasamtamaaduduvu (ఆకెతోమారు వసంతమాడుదువు)

ఆకెతో మారువసంత మాడుదువు రావయ్య
యీకడ నాకడఁ జూచే మెవ్వ రిందు బలువో       ॥ పల్లవి ॥

కన్నుల చూపుల నింతి కలువ రేకులు చల్లి
సన్నలనే కప్రాలు సారెఁ జల్లీని
చన్నుల మెఱుఁగులను సరిఁ గుంకుమలు చల్లి
ఇన్నిటా వసంతమాడీ నిదివో నీ మీఁదను      ॥ ఆకెతో ॥

వేడుకనవ్వు లనే వెన్నెల లెల్లాఁజల్లి
వాడిక మాటలనే వలపు చల్లి
కూడేటి కోరికెలను కుచ్చు ముత్తెములు చల్లి
యీడుగా వసంత మాడీ నిదివో నీమీఁదను      ॥ ఆకెతో ॥

సమరతి నిట్టూర్పుల జాజరగాలి చల్లి
చెమటఁ బన్నీరు మచ్చికఁ జల్లీని
అమరే శ్రీ వేంకటేశ అలమేలుమంగ యీకె
హీమపు వసంతమాడీ నిదివో నీమీఁదను       ॥ ఆకెతో ॥