Aape Naachellelu Gaadaa (ఆపె నాచెల్లెలు గాదా)

ఆపె నాచెల్లెలు గాదా అందుకేమి
నా పొందు విడువనని నమ్మించేవు నీవు  ॥ పల్లవి ॥

ప్రేమము గలిగినాపె ప్రియపడి మాటాడఁగా
నామోము చూచి యేమి నవ్వేవు నీవు
వేమరు గడ్డము వట్టి వేడుకొని పిలువఁగా
ఆముకొని నన్నే లప్పణడిగేవు నీవు     ॥ ఆపె ॥

వావి గలసిన యాపె వలపులు చల్లఁగాను
సోవలుగా నాకేఁటికిఁ జూపేవు నీవు
కావరించి యిక్కువకు గనుసన్న సేయఁగా
భావించి నన్నెంత వొడఁబరచేవు నీవు   ॥ ఆపె ॥

పొరుగున నున్నయాపె భుజముపైఁ జెయి వేయఁగా
అరసి నన్నిట్టుగూడే వప్పటి నీవు
నిరతి శ్రీవేంకటేశ నే నలమేలుమంగను
సిరుల నిచ్చకా లెన్ని సేసేవు నీవు     ॥ ఆపె ॥