Amdukane Gaaka Nenu (అందుకనేఁ గాక నేను)

అందుకనేఁ గాక నేను అడుగుకో నోపనా
యెందరికైనాఁ దాను ఇచ్చకములాడునే     ॥ పల్లవి ॥

ఆవేళ కక్కూర్తిమాట లాడుఁగాని వేరొకతె
కైవశము సేసుకొంటే గానిమ్మనునే
చేవట్టి నేఁదీసితే చిత్తగించి వచ్చీఁ గాని
వావి యెవ్వతె చెప్పినా వలపులు చల్లునే    ॥ అందు ॥

వొద్దనున్న అంతవడి వొడఁబడి వుండుఁగాని
బుద్దియెవ్వతె చెప్పినా నపుడే వినునే
తిద్దుకొని బాసగొంటే దిష్టముగా నిచ్చుఁగాని
బద్దు లెవ్వతాడించినాఁ బలుమారు నాడునే  ॥ అందు ॥

సరసములాడితేను చనవిచ్చుఁ గాని వేరే
తరుణి కాఁగిలించితే దక్కివుండునే
యిరవై శ్రీవేంకటేశుఁడిటు తానే నన్ను గూఁడె
యెరవుల వారినెల్లా నెనసీ నెనయఁడే      ॥ అందు ॥