Akkavu Neevu Naaku (అక్కవు నీవు నాకు)

అక్కవు నీవు నాకు నైనానైతివి గాని
వొక్కింతవడికైనా నోపుదువటె        ॥ పల్లవి ॥

చెలరేఁగి చెలరేఁగి చేతులు చాఁచేవు నీవు
వలెనటే నీతో నీకు వరవాతాను
బలుములు చూపి పెక్కుపంతములాడుకొనేవు
నిలిచేవా నాముందర నేరుపులను       ॥ అక్క ॥

నారువోసి నారువోసి నవ్వులు నవ్వేవు నీవు
వోరిచేవటే నాతో వొడ్డారాలకు
పేరువాడి పేరువాడి బిరుదులు మెరసేవు
చేరఁగలవా నాచేవల్లకు             ॥ అక్క ॥

పెచ్చురేఁగి పెచ్చురేఁగి పెనఁగేవు నాతోను
వచ్చేవటే నాతోడి వరుసలకు
యిచ్చగించి శ్రీవేంకటేశుఁ డిద్దరిఁ గూడె
మెచ్చేవటే నిన్నుమించినయందుకును  ॥ అక్క ॥