Ante Pani Galite (అంతే పని గలితే)

అంతే పని గలితే నానతీవయ్యా
వింతవారమా నేము వెఱపేలయ్యా    ॥ పల్లవి ॥

తలఁపు లేకములైతే తగవుకుఁ బనిలేదు
చెలులసాకిరులేల చెప్పేవయ్యా
నిలుచున్నాఁడ వప్పటి నీ కెంత పనిగద్దో
యెలమి మాతో జోలి యెందాఁకానయ్యా   ॥ అంతే ॥

బాసలే నీజములైతే పదరఁగఁ బనిలేదు
గోసనాసగా వేఁడుకొన నేలయ్యా
ఆసపడ్డాఁడవు నీవు అడ్డమాడ దోసము
సేసపాలదాన నీ చిత్తమిఁకనయ్యా    ॥ అంతే ॥

కూడిన యిప్పటిమీఁద కొసరఁగఁ బనిలేదు
నోడలఁ బెట్టుచుఁ జెక్కునొక్కనేలయ్యా
యీడనే శ్రీ వేంకటేశ యెనసితివి పాయపు
వీడెమిచ్చెలసితివి వేగినంతానయ్యా   ॥ అంతే ॥