Aduvaara Me Manemu Atte (ఆడువార మే మనేము అట్టె)

ఆఁడువార మే మనేము అట్టె నీ వేమి సేసినా
నేఁడు పుణ్యపాపాలు నీ చేతిది గాకా     ॥ పల్లవి ॥

నగుతానె ఆపెనూ నన్నునూ వాదులు వెట్టి
పగ సాదించితిగా పంతగాఁడా
తగవులు చెప్పె నంటా దగ్గరించి మావలపు
తగిలించుకొంటివి గా తక్కరికాఁడా      ॥ ఆఁడు ॥

మచ్చిక నే మాడెటిమాటలు వేలుచుకొని
కుచ్చితాలు సేసితిగా కొయ్యకాఁడా
కొచ్చి కొచ్చి నీ మీఁదఁ గోరి యాన లెల్లాఁ బెట్టి
తెచ్చితిగా నీయింటికి దిమ్మరీఁడా      ॥ ఆఁడు ॥

వాసులు మాకు నెక్కించి వద్దఁ బాయకుండఁ జేసి
సేసలు వెట్టితివిగా సిగ్గరీఁడా
ఆసల శ్రీవెంకటేశ అలమేలుమంగ నేను
నాసరి నాకెఁ గూడితి నాఁటకీఁడా       ॥ ఆఁడు ॥