Aluka Gaadu Neeto Nannitaa (అలుక గాదు నీతో నన్నిటా)

అలుక గాదు నీతో నన్నిటా మన్ననదాన
చలపట్టి యందరితో సరి సేయ కిఁకను       ॥ పల్లవి ॥

చిత్తము నొవ్వకుమీ చెప్పే నే నొకమాట
హత్తిమంచ మెక్కు మన కంతే చాలు
యిత్తల నీ కూడిగాలు యెన్ని యైనఁ జేసేఁ గాని
పొత్తుల యెంగిలితోడి బోగము సయించదు      ॥ అలు ॥

ఆనలు వెట్టకుమీ అడిగే నే కొకయీవి
పూని నాతోడ నవ్వకు పొందులే చాలు
కానిమ్మని నీవద్ద నేఁ గాచుకుండే నేపొద్దు
సానఁ బట్టేసరసాలు చవి గాదు నాకును      ॥ అలు ॥

చేతుల మొక్కకుమీ సేసేఁ గాని నీమాఁట
రాతిరి నన్నుఁ గూడినరతులే చాలు
యీతల శ్రీవెంకటేశ యిప్పుడు నన్నుఁ గూడితి
కాతరాన నీతోడఁ గపట మెరఁగనూ        ॥ అలు ॥