Adiyela Neevucheppinattu (అదియేల నీవుచెప్పినట్టు)

అది యేల నీవు చెప్పినట్టు చేసేనే
కదిసితి మిఁకనేల కంటి మన్నిపనులు    ॥ పల్లవి ॥

బాససేయుమంటే నేఁ బాముఁ బట్టేనే అవులే
భాసురపునీపరపు పామేకాదా
మోసదీర జలధి ఇమ్ములఁ జొచ్చేనే నీవు
వాసికి జలధిఁబండేవాఁడవే కాదా       ॥ అది ॥

చింతదీర ననలంబు చేతఁబట్టేనే తొల్లి
బంతి నగ్నిమింగినట్టిబాలుఁడవేకా
దొంతరకొండలతో నేఁ దులఁదూఁగేనే నీ-
కింతేల గోవర్దనగిరెత్తవా తొల్లి          ॥ అది ॥

యెంచనేల మీఁదిమాట లేమనేవే అయితే
పంచ నొక్క యక్షరమె పంతమీవయ్యా
పెంచనేల నీకు నాకు భేదమటవే యిఁకఁ
గొంచక శ్రీవేంకటేశ కూడితి యిందులకు   ॥ అది ॥