Anduke Taa Negguvattee (అందుకే తా నెగ్గువట్టీ)

అందుకే తా నెగ్గువట్టీ నంతేకాక
పొందిన పతికి మీరే బుద్ది చెప్పరమ్మా     ॥ పల్లవి ॥

కోపగించితినటనే కొంగవట్టి తియ్యఁగాను
వోపనంటాఁ బెనఁగితి నూరకే నేను
పైపైఁ దిట్టితినటే వచ్చిమాట లాడఁగాను
కోపులఁ బెదవులనే గొణఁగితిఁ గాక        ॥ అందు ॥

కైకోనటవే నేను గబ్బితనాల నుండఁగ
ఆకడ నే నవ్వలి మోమైతిఁ గాక
జోకఁ దాఁ బిలిచినట్టి చోటికి రానటే నేను
యేకతానఁ దా నుండఁగా ఇంట నుంటిఁగాక   ॥ అందు ॥

కూడివుండనటే నేను గొబ్బున నుమ్మగించఁగా
వాడు వాకిటికేఁగి వంతనుంటిని
వేడుక శ్రీవేంకటాద్రివిభుఁడు నన్నిటు గూడె
పాడిపంతా లెఱఁగనా భ్రమసితిఁ గాక     ॥ అందు ॥