Adela Neevaapecheta (అదేల నీవాపెచేత)

అదేల నీవాపెచేత నాడించేవోయి
సదరానఁ దన్ను నేను సాదించితినా       ॥ పల్లవి ॥

పైపై నిన్నే వెంగెములు పలికి దూరితిఁగాక
ఆపెనేమైనాఁ గోపించి అంటినా నేను
రాపుల నిన్నే కొసరి రాయడించితిఁగాక
చాఁపుచుఁజేతులఁ దన్ను జరసితినా       ॥ అదే ॥

తివిరి నీ మేనునాఁట దిష్టించి చూచితిఁగాక
సవతెంటాఁ గన్నులను జంకించితినా
పవళించుమని నిన్నే బలిమి సేసితిఁగాక
తవిలి కేరడముతో తన్ను నే నవ్వితినా      ॥ అదే ॥

చలపట్టి నిన్నుఁ గోరి సన్నలు చేసితిఁగాక
తలకొని చెల్లెలంటాఁ దడవితినా
నెలవై శ్రీవేంకటేశ నిన్ను నే మెచ్చితిఁగాక
అలమేలుమంగను నే నట్టె తన్నెంచితినా     ॥ అదే॥