Adugare Yeemaata Avuno (అడుగరే యీమాట అవునో)

అడుగరే యీమాట అవునో కాదో
బడిబడి నిందరిలోఁ బచారించవలెనా     ॥ పల్లవి ॥

యీతల నేవిన్నవించేదేమి సారెసారెకు
అతఁడే యెరుఁగునే అన్నియును
ఘాతల నామీఁదనే కరుణఁగలఁడు తొల్లె
నీతులుగా నిఁక వేరే నేరుపఁగవలెనా       ॥ ఆడు ॥

పూనివట్టి నే నిప్పుడు పొంచి యెచ్చరించేదేమి
తానే యెరుఁగునే తలఁపులెల్లా
యీనెలవులనే నన్నే యేలుకొని వున్నవాఁడు
వీనుల నే నింతేసి వివరించవలెనా      ॥ ఆడు ॥

మఱవకుమని నేను మరి వేఁడుకొననేల
యెఱుఁగునే శ్రీవేంకటేశ్వరుఁడే
అఱిముఱి నన్నుఁ గూడె నలమేల్ మంగను నేను
గుఱిసేసి యింకా మఱి కొసరఁగవలెనా      ॥ ఆడు ॥