Amtaratma Niyadhina (అంతరాత్మ నీయాధీన)

అంతరాత్మ నీ యాధీన మింతయు
చింతలు సిలుగులు జీవులకెల్లా    ॥ పల్లవి ॥

చిత్తంబనియెడి సింహాసనమది
వుత్తమ పురుష నీవుండెడిది
హత్తి యింద్రియములందుఁ బ్రధానులు
ప్రత్తెక్ష రాజ్యము ప్రకృతియుఁ గలిగె  ॥ అంత ॥

కన్నులుఁ జెవులును ఘ్రాణము నాలికె
వన్నెమేను నీ వాహములు
పన్నిన కోర్కులు భండారంబులు
సన్నుతి సంసారసంపద గలిగె    ॥ అంత ॥

పుట్టిన పుట్టుగు భోగపుకొటారు
పట్టము కర్మానుబంధంబు
గట్టిగ శ్రీవేంకటపతి వేలిక-
విట్టి నీ మహిమ లిన్నిటఁ గలిగె    ॥ అంత ॥