Anni Neeve Telusuko (అన్ని నీవే తెలుసుకో)

అన్ని నీవే తెలుకో అటమీఁది పనులు
కన్నులనే నిన్ను మెచ్చి కాచుకుండే నేను ॥ పల్లవి ॥

పంతాలు నీతోఁ జెప్పి పలుమారు కొసరఁగ
యెంతటి రట్టడియని యేమందువో
మంతనాన నీరూపు మనసునఁదలచుక
చింతదీర నూరకుండి చేత మొక్కేను    ॥ అన్ని ॥

ఆయములు నన్ను నంటి అంకెలకుఁ దియ్యఁగాను
యీయెడ నిల్లాలి కింత యేలందువో
చేయార నీసేవ చేసి చేరి నీపానుపువద్ద
తోయరానిసిగ్గుతో నెదురుచూచే నేను    ॥ అన్ని ॥

నీవు గాఁగిలించుకోఁగా నిఱ్ఱనీలిగి వుంటేను
యీవనిత గర్వియని యేమందువో
శ్రీ వేంకటేశ నీచేతికిలోనై కూడితి
భావించి యేపొద్దు నిట్టె పాయకుండే నేను ॥ అన్ని ॥