Ankekaada Vogunootuloubhalela (అంకెకాడ వోగునూతులౌభళేళ)

అంకెకాఁడ వోఁగునూతు లౌభళేశ
పొంకమాయ నీ సతిపొందు మఱవకుమీ    ॥ పల్లవి ॥

తగులనాడినమాట తమితోఁ జూచినచూపు
మగువనేరుపు లివి మఱవకుమీ
చిగురుమోవివిందు సిగ్గుతోడి మురిపెము
నిగిడించినా పెను నీవు మఱవకుమీ      ॥ అంకె ॥

సెలవి నవ్విననవ్వు చేతుల మొక్కిన మొక్కు
మలయజగందిచేత మఱవకుమీ
కొలువులో సరసము గుట్టుతోడివినయము
యెలమి నీకెగుణము లిఁక మఱవకుమీ     ॥ అంకె ॥

మేనిపై నొత్తినగోరు మిక్కుటపుకాఁగిలి
మానినిచేసిన మేలు మఱవకుమీ
పూని శ్రీవేంకటేశుఁడ భోగములవొడఁబాటు
నానాఁడే ఇచ్చినది యెన్నఁడు మరవకుమీ   ॥ అంకె ॥