Amgadimaavalapu Nee (అంగడిమావలపు నీ)

అంగడి మా వలపు నీకనువాయను
వుంగరము వెట్టవయ్య వొక్కమనసాయను    ॥ పల్లవి ॥

తమకించి నీవు ముందే తగవులు చెప్పఁగాను
అమర సాకిరెవ్వరి నడిగేము
రమణుల మిద్దరము రతికి లోనైతిమి
జమళిఁ బెండ్లాడవయ్య చలము లీడేరెను    ॥ అంగ ॥

పొదగి నీవే మాకు బుద్దులు నేరుపఁ గాను
కదిసి మాకిఁక నేల కాఁతాళాలు
సదరాన నీకు నేము చనవరుల మైతిమి
ఇదె సేసవెట్టవయ్య యెంచినటు లాయను    ॥ అంగ ॥

శ్రీ వేంకటేశ నీవు చేరి మమ్ముఁ గూడఁగాను
చేవదేరె నెవ్వరేమి చెప్పే రింక
భూవనిత యాకె నెప్పుడూ నలమేల్మంగను
నీవే కాఁగలించవయ్య నిండెను వేడుకలు    ॥ అంగ ॥