Aakerugu Neeverugu Dantesi (ఆకెఱుఁగు నీవెఱుఁగు దంతేసి)

ఆకెఱుఁగు నీవెఱుఁగు దంతేసి మాకననేల
సాకిరి యడిగితేను సముకాన నాడేము           ॥ పల్లవి ॥

చలములు నీతోను సాదించ నాకేమిటికి
చెరి(లి?) వద్దికిఁ బోరాదా చెప్పీఁగాని
యెలమి నీ వెక్కడనోయేమేమో సేసితివట
కొలఁదితో నవీఁ గొన్ని కొంతగొంత వింటిమి      ॥ ఆకె ॥

యెదుటనే మోవిచొప్పు లెత్తంగ మాకేమిటి?
సుదటి నడుగరాదా చూపీఁగాని
చెదరించనేల నీకు ప్రేమ మెందో వున్నదట
అదనఁ బొరుగువారు ఆడఁగానే వింటిమి       ॥ ఆకె ॥

వేమారు నిన్ను మాకు వెరసించనేమిటికి
కోమలికి మొక్కరాదా కూడీఁగాని
నేమపుశ్రీవేంకటేశ నీవే యీకె నేలితట
కామిని లిందరునుఁ బొగడఁగా వింటిమి         ॥ ఆకె ॥