Aanatiyyavayyaa Naato Naamelu Vine Nenu (ఆనతియ్యవయ్యా నాతో నామేలు వినే నేను)

ఆనతియ్యవయ్యా నాతో నామేలు వినే నేను
తానకమై ఇన్నిటాను తనివి నొందించెనా   ॥ పల్లవి ॥

మొక్కలాన నేఁడు నీమోమునఁ గళలు నిండె
చెక్కులు నొక్కెనా ఆపె సేదదేర్చెనా
చిక్కనిచెమటలతో చిందువందై వున్నాఁడవు
కక్కసించి మరీ నట్టె కాలుదొక్కెనా      ॥ ఆన ॥

నవకపు సెలవులనవ్వు వెన్నెలలు గాసీ
చవి చూపెనా మోవి; చాఁచెనాచేయి
అవల నీ వల్లాఁ జూచి అలసేవు నీలోనే
జవళిఁ గాఁగిటిలోనే సాముసేయించెనా    ॥ ఆన ॥

చిత్తగించి నన్నుఁ జూచి సిగ్గులుపడే విదె
పొత్తు గుడిపించెనా భోగించెనా
యిత్తల శ్రీవేంకటేశ యిటు నన్నుఁ గూడితివి
హత్తించెనా పొందు అట్టె యిందు వచ్చెనా   ॥ ఆన ॥