Ammaro Yemtati Sahasive (అమ్మరో యెంతటి సాహసివే)

ఆమ్మరో యెంతటి సాహసివే నీవు
కమ్మర నాతఁడే నిన్నుఁ గరుణించీఁ గాక    ॥ పల్లవి ॥

వుడివోని వలపులు వొడిఁగట్టుకొని వుండి
జడియక పతినెంత జంకించేవే
చిడుముడిఁ దలఁబాలు శిరసు పైఁ బెట్టుకుండి
బడిబడి నతనితో పంతాలే లాడేవే      ॥ అమ్మ ॥

గట్టిగా నీతమకము గాదెలఁ బోసుకువుండి
అట్టె బింకాన నెంత యద్దనించేవే
మట్టులేని కోరికలు మనసులోఁ బెట్టుకుండి
నెట్టన నాతనినేల నేరము లెంచేవే      ॥ అమ్మ ॥

సమరతి జవ్వనము చన్నులపైఁ బెట్టుకుండి
కొమరెవు యిఁకనేల గుట్టుసేసేవే
అమర శ్రీవేంకటేశుఁ డంతలోనె నిన్నుఁ గూడె
తిమిరి యతని నెంత దిష్టంచి చూచేవే    ॥ అమ్మ ॥