Adi Naamele Kaadaa (అది నామేలే కాదా)

అది నా మేలే కాదా ఆ వనిత నేనే కానా
పోదిగొన నన్నిందు కిపుడే మెచ్చెఁగాక     ॥ పల్లవి ॥

దగ్గరి వచ్చెనా ఆపె తమకించెనా నీపై
సిగ్గులు వడక నాతోఁ జెప్పరాదా
వెగ్గళించెనా నిన్ను వెరపు నీకేమిటికి
నిగ్గులఁ బరిణామించి నిండుకొనేఁగాక     ॥ అది ॥

అంగన నీతో నవ్వెనా ఆకు మడిచిచ్చెనా
చెంగనేల నాతోఁ గొంత చెప్పరాదా
కంగు వెట్టేనా నీతో కల్ల గుట్టు నీకేఁటికి
పొంగుచు నీ గుణములు పొగడేగాక       ॥ అది ॥

కలిసితిరా ఇద్దరు కాఁగిలించెనా నిన్ను
చెలరేఁగి నాతో నిట్టె చెప్పరాదా
అలరి శ్రీ వేంకటేశ అట్టె నన్నుఁ గూడితివి
చలివాసి యీరెంటికిఁ జనవిచ్చేగాక      ॥ అది ॥