Ape Nenu Savatula (ఆపె నేను సవతుల)

ఆపె నేను సవతుల మామాఁటె నామాట
తీపులు వుట్టించితిని తెలుసుకో ఇపుడు   ॥ పల్లవి ॥

ముందర నున్నది చెలి ముసి ముసి నవ్వులతో
విందులు వెట్టీ మీకు వీడెపుమోవి
చెంది నీకు మేలు సుద్ది చెప్పితి నిదివో నేను
ఇందుకు నాకేమి మెచ్చు ఇచ్చేవో ఇపుడు ॥ ఆపె ॥

చేయి చాఁచీ నాపె నీపై సేసపాల దోసిటితో
చాయల గప్పములిచ్చీ జంటచున్నులు
సోయగపు సగినాలు చూచి చెప్పితి నిదివో
తీయని నారుణ మెట్టు తీర్చేవో ఇపుడు   ॥ ఆపె ॥

పొంకక కాఁగిలించీని కొనగోరి పంతాలతో
వుంకువలు వెట్టీఁ జనవుల రతులు
పొంకపు శ్రీ వేంకటేశ బుద్దులు చెప్పి కూడితి
నింకా నాకుఁ జనవు లెట్లిచ్చేవో యిపుడు ॥ ఆపె ॥