Anatiyyavayyaa Vine Navee Gonnivedukalu (ఆనతియ్యవయ్యా వినే నవీ గొన్నివేడుకలు)

ఆనతియ్యవయ్యా వినే నవీఁ గొన్నివేడుకలు
వీనుల పండుగగాను వినోదము లెల్లాను   ॥ పల్లవి ॥

తచ్చి నీ మోహపు కాంత తలఁపాయనో నీకు
కచ్చు పెట్టి మోమునిండాఁ గళ రేఁగెను
గచ్చుల నాపెఁ గాఁగిట గాఁగిలించినట్టాయనో
మచ్చిక నీ మేనఁ జెమటలు గారీని     ॥ ఆన ॥

కోమలి నీ మై నించిన గురుతు చాచుకొంటివో
నామువార సెలవుల నవ్వు దేరీని
ఆముక యాపె కెమ్మోవి యాస నీకు ముంచెనో
కామించి మదరాగము కన్నులఁ జూపట్టెను ॥ ఆన ॥

పడతి నప్పుడే నీవు భావమునఁ గూడితివో
కడుఁగడు మేనెల్లా గురుపారెను
యెడయక శ్రీవేంకటేశ నన్ను నేలితివి
వుడివోనివలపుల నోలలాడేవు       ॥ ఆన ॥