Andukemi Dosamaa Anniyu Ne (అందుకేమి దోసమా అన్నియు నే)

అందుకేమి దోసమా అన్నియు నే నెఱఁగనా
చెందివున్నదాన నెట్టుసేసినాఁ జేయవయ్యా ॥ పల్లవి ॥

పిలిచితేనే పతులు పెనఁగఁగఃజూతురు
అలిగితే మొక్కుదురు అతివలకు
కలయఁగ జూచితేనుకడుఁ గిందుపరతురు
చలము సాదించితేను చనవిత్తురు       ॥ అందు ॥

నగితేనే సారాసారె నాలిసేయఁజూతురు
పగచాటితే నట్టె పైకొందురు
తగుల మాటాడితేను తప్పు లెంచఁజూతురు
మొగము చూచి తిట్టితే మోహింతురు    ॥ అందు ॥

వలపు పైఁజల్లితేను పట్టారడిఁ బెట్టుదురు
అలరి సిగ్గున నుంటే సగింతురు
కలసితి విటు నన్ను గక్కన శ్రీవేంకటేశ
యిలలో మనపొందుల కిందరునుమెత్తరు ॥ అందు ॥