Anta Yela Vorasevu Appati (అంత యేల వొరసేవు అప్పటి)

అంత యేల వొరసేవు అప్పటి నన్ను
కాంతలకు నీమోవి గాడిపట్టుగాదా    ॥ పల్లవి ॥

నలసెల్లా నాదెకాక వాసులెంచిచూచితేను
పలువురనేలేనీకుఁ బాటి వున్నదా
బలిమిసేసి నాచేతఁ బడితలింపించితేను
వెలలేనినీ కాఁగిలి విడిదిల్లుగాదా    ॥ అంత ॥

సిగ్గెల్లా నాదెకాక చేరి యెరుకపరచితే
వొగ్గినయాసలనీకు వోజ వున్నదా
అగ్గలమై నీవు గడునంత నన్ను రెఁచితేను
తగ్గనినీమే నన్నిటా దాయిమానుగాదా ॥ అంత ॥

పంతమెల్లా నాదెకాక భావించి చూచితేను
యింతులకు మొక్కేనీకు యెమ్మెవున్నదా
ఇంతటి శ్రీవేంకటేశ ఇట్టె నన్నుఁ గూడితివి
పొంతలనే శిరసిది బొడ్రాయి గాదా  ॥ అంత ॥