Aa Rupamunake Hari (ఆ రూపమునకే హరి)

ఆ రూపమునకే హరి నేను మొక్కెదను
చేరి విభీషణుని శరణాగతుఁడని చేకొని సరిఁ గాచితివి || పల్లవి ||

ఫాలలోచనుఁడు బ్రహ్మయు నింద్రుఁడు
సోలి నగ్నియును సూర్యచంద్రులు
నీలోనుండఁగ నెరిఁ గనెఁ గిరీటి
మూలభూతివగుమూర్తివి గాన || ఆ రూప ||

అనంత శిరసుల ననంతపదముల –
ననంతనయనము లనంతకరముల
ఘన నీరూపము గనుఁగొఁనె గీరీటి
అనంతమూరితి వన్నిటఁ గాన || ఆ రూప ||

జగములిన్నియును సకల మునీంద్రులు –
నగు శ్రీవేంకటనాథుఁడ నిన్నే
పొగడఁగఁ గిరీటి పొడగనె నీరూపు
అగణితమహిముఁడ వన్నిటఁగాన || ఆ రూప ||