Amgana Ninnadigi (అంగన నిన్నడిగి)

అంగన ని న్నడిగి రమ్మనె నీ మాట
సంగతిగ మరుమాట సరి నానతీవయ్యా    ॥ పల్లవి ॥

చెలులచే నింతి నీకు చెప్పి పంపిన మాటలు
తలఁచుకొన్నాఁడవా దయతో నీవు
తొలుతఁ గాను కంపిన దొడ్డ పూవుల బంతి
లలిమించిన పరిమళము గొంటివా    ॥ అంగ ॥

చాయల నాతో నాపె సారెఁ జూచిన చూపులు
ఆయములు గరఁచెనా అంటుకొనెనా
చేయెత్తి సిగ్గు తోడ చేరి మొక్కిన మొక్కులు
ఆయనా నీకు శలవు అందరిలోనా    ॥అంగ ॥

బెరసి తెరమాటునఁ బెట్టిన నీపై సేసలు
శిరసుపై నిండెనా చిందెనా నీపై
అరుదై శ్రీ వేంకటేశ అలమేలుమంగ యీకె
గరిమ నిన్నుఁ గూడి గద్దెపైఁగూచున్నది    ॥ అంగ ॥