Amdariki Sulabhudai (అందరికి సులభుడై)

అందరికి సులభుఁడై అంతరాత్మ యున్నవాఁడు
యిందునే శేషగిరిని యిరవై విష్ణుఁడు       ॥ పల్లవి ॥

యోగీశ్వరులమతినుండేటిదేవుఁడు క్షీర –
సాగరశాయియైనసర్వేశుఁడు
భాగవతాధీనుఁడై నపరమపురుషుఁడు
ఆగమో క్తవిధులందు నలరిననిత్యుఁడు      ॥అంద॥

వైకుంఠమందునున్న వనజనాభుఁడు పర –
మాకారమందునున్నఆదిమూరుతి
ఆకడసూర్యకోట్లందునున్నపరంజ్యోతి
దాకొన బ్రహ్మాండాలుధరియించినబ్రహ్మము   ॥అంద॥

నిండువిశ్వరూపమై నిలిచినమాధవుఁడు
దండివేదంతములు వెదకే ధనము
పండినకర్మఫలము పాలకిచ్చినరాసి
అండనే శ్రీ వేంకటేశుఁడైనలోకబంధుఁడు    ॥అంద॥