Achyuta Mimmu (అచ్యుత మిమ్ము)

అచ్చుత మిమ్ముఁదలచేయంతపని వలెనా
యిచ్చల మీవారే మాకు నిహపరా లియ్యగా    ॥ పల్లవి॥

మిమ్ము నెఱిఁగినయట్టిమీదాసుల నెఱిఁగే –
సమ్మతివిజ్ఞానమే చాలదా నాకు
వుమ్మడి మీ సేవసేసుకుండేటి వైష్ణవుల –
సమ్ముఖాన సేవించుటే చాలదా నాకు      ॥ అచ్చ ॥

నిరతి నీకు మొక్కేనీడింగరీలకు
సరవితో మొక్కుటే చాలదా నాకు
పరగ నిన్నుఁ బూజించేప్రపన్నులఁ బూజించే –
సరిలేనిభాగ్యము చాలదా నాకు          ॥ అచ్చ ॥

అంది నీకు భక్తులైనయలమహానుభావుల –
చందపువారిపై భక్తి చాలదా నాకు
కందువ శ్రీవేంకటేశ కడు నీబంటుబంటుకు
సందడిబంట నవుటే చాలదా నాకు       ॥ అచ్చ ॥