Adiyu Neebhaagyamu (అదియు నీభాగ్యము)

అదియు నీభాగ్యము అవధరింతువుగాక
వెదకి వచ్చేటివారే వేగినంతాను       ॥ పల్లవి ॥

కాతరించి నీమోము గంటేఁజాలుఁగాని
చేతులు చాఁచేవారే చెలులెల్లాను
ఆతలనీతల నీవు అండకు వచ్చితేఁ జాలు
యేతుల నవ్వేవారే యేడనైనాను        ॥ అది ॥

మక్కువ నోరుదెరచి మాట నీవాడితేఁచాలు
గక్కనఁ దిట్టేవారే కాంతలెల్లాను
చక్కనినీ వేపాటి సమ్మతించినాఁజాలు
యిక్కువ లంటేవారే యెవ్వరైనాను     ॥ అది ॥

వలపులు చల్లుచు నీవు వావులు చెప్పితేఁ జాలు
అలరి పెండ్లాడేవారే అంగనలెల్లా
యెలమి శ్రీవేంకటేశ యిటు నన్నుఁ గూడితివి
కలసేమనేవారే యేకాలమైనాను        ॥ అది ॥