Alladivo Niluchuka (అల్లదివో నిలుచుక)

అల్లదివో నిలుచుక ఆతఁడున్నాఁడు
తెల్లమిగా నిన్నుఁ గూర్చే తెలుసుకోరాదా    ॥ పల్లవి ॥

అదనెరిఁగి మాటాడేనాతని నీడకుఁ దెచ్చే
సుదతి నానేరుపెల్లఁ జూడరాదా
కొదలెల్లఁ దీరవలె గురుతులు గావలె
చదరుఁదనము నీవు సంతోసించరాదా     ॥ అల్ల ॥

తలఁపెల్ల భ్రమయించే తరి తీపు వుట్టించే
మెలుఁతరో నీవు నన్ను మెచ్చరాదా
సెలవుల నవ్వించే చేతికి లోనుగాఁ జేసే
సెలవు నాకిదె నేఁడు చిత్తగించరాదా      ॥ అల్ల ॥

ఆసలెల్లఁ బుట్టించే నలవాట్లెల్లఁ జేసే
చేసన్నకు లోనుసేసేఁ జేపట్టరాదా
యీసరికి శ్రీవేంకటేశుడట్టె విచ్చేసి
రాసికెక్క నినుఁగూడె రాజ్యమేలరాదా     ॥ అల్ల ॥