Amdariki Nekkudaina (అందరికి నెక్కుడైన)

అందరికి నెక్కుడైన హనుమంతుఁడు
అందుకొనె సూర్యు ఫలమని హనుమంతుఁడు    ॥ పల్లవి ॥

బల్లిదుఁడై లంక చొచ్చి బలురాకాసులఁ గొట్టి
హల్లకల్లోలము చేసె హనుమంతుఁడు
వొల్లనె రాములముద్దుటుంగరము సీత కిచ్చె
అల్లదె నిలుచున్నాఁడు హనుమంతుఁడు       ॥అంద॥

దాకొని యాకెముందర తనగుఱు తెరుఁగించి
ఆకారమటు చూపె హనుమంతుఁడు
చేకొని శిరోమణి చేతఁబట్టి జలనిధి
ఆకసాన దాఁటివచ్చె హనుమంతుఁడు        ॥అంద॥

కొంక కిట్టె సంజీవికొండ దెచ్చి రిపులకు
నంకకాఁడై నిలిచెను హనుమంతుఁడు
తెంకినే శ్రీవెంకటాద్రి దేవుని మెప్పించినాఁడు
అంకెఁ గలశాపురపుహనుమంతుఁడు         ॥అంద॥