Amgadi Nevvaru (అంగడి నెవ్వరు)

అంగడి నెవ్వరు నంటకురో యీ
దొంగలఁ గూడిన ద్రోహులను    ॥ పల్లవి ॥

దోసము దోసము తొలరో శ్రీహరి
దాసానదాసుల దగ్గరక
ఆసలనాసల హరినెఱఁగక చెడి
వీసర పోయిన వెఱ్ఱులను      ॥ అంగడి ॥

పాపము పాపము పాయరో కర్మపుఁ
దాపపువారము దగ్గరక
చేపట్టి వేదపు శ్రీహరికథలు
యేపొద్దు వినని హీనులము    ॥ అంగడి ॥

పంకము పంకము పైకొని రాకురో
కొంకుఁ గొసరుల కూళలము
వేంకటగిరిపై విభుని పుణ్యకథ
లంకెల వినని యన్యులము    ॥ అంగడి ॥