Annitaa Bhagyavantuda (అన్నిటా భాగ్యవంతుఁడ)

అన్నిటా భాగ్యవంతుఁడ వౌదువయ్యా
కన్నులెదిటి నిధులు కాంతలు నీ కెప్పుడు ॥ పల్లవి ॥

సందడిఁ బాదము దొక్కి సరిఁ బెండ్లాడితినంటా
ముందు ముందే చుట్టరికములు చెప్పేవు
యెందరిఁ గైకొంటివో యిటువలెనే తొల్లి
అందుకోలువావు లిట్లు అబ్బె నీకు నిపుడు ॥ అన్ని॥

చెలఁగి పోచిళ్లు చల్లి సేసలు వెట్టితినంటా
మలసి పెండ్లివిడేలు మాకుఁ బెట్టేవు
ఇల పై నెవ్వరెవ్వరి నిట్లాఁ జేసుకొంటివో
లలిఁ బొరుగు నేస్తాలు లాభించె నిపుడు ॥ అన్ని॥

మెచ్చి కాఁగిలించుకొని మేనదాననని
కుచ్చి పెండ్లికూఁతురంటా గురి సేసేవు
ఇచ్చట శ్రీ వేంకటేశ ఇది నీకు నలవాటో
చెచ్చెర నీ కోరికలు సిద్ధించె నిపుడు   ॥ అన్ని॥