Annitanu Nive (అన్నిటాను నీవే)

అన్నిటాను నీవే వుందువుగాన
యిన్ని నీవు పుట్టించిన వివి నీసొమ్ములే      ॥ పల్లవి ॥

నిలిచినరూపులెల్లా నీగుళ్ళుగా దలతు
మెలగేటిదై తన్యము మిమ్ముగా దలతు
యిలలోనిధ్వనులు నీపలుకులుగా దలతు
కలపంచభూతా లుపకరణాలుగా దలతు     ॥ అన్నిటా ॥

నారుకొన్నపంటలు నీనైవేద్యాలుగా దలతు
నీరెల్లా నీతీర్థమని నెమ్మి దలతు
ధారుణి భోగాలు పూజాద్రవ్యాలుగా దలతు
నేరిచినపనులెల్లా నీలీలలుగా దలతు       ॥ అన్నిటా ॥

కాలత్రయము నీగతులుగానే తలతు
చాలి సురల నీయనుచరులగానే తలతు
నాలోని శ్రీవేంకటేశ నాతండ్రివని తలతు
తాలిమి నీదేవులని తల్లియని తలతును     ॥ అన్నిటా ॥