Amdaru Vinnaa Vinanee Yaadegaani (అందరు విన్నా విననీ యాడేగాని)

అందరు విన్నా విననీ యాడేఁ గాని
సందడింపు మేకులకుఁ జాలఁబో నేనూ    ॥ పల్లవి ॥

సేయరా నీపనులెల్లాఁ జేసేఁ గాని
వోయయ్య నీవినయాల కోపఁబో నేను
పాయరానిరాజసానం బడేఁ గాని
వేయైనా నీయానలు వినలేఁబో నేను      ॥ అంద ॥

నగవు రాకుండినా నవ్వేఁ గాని
వొగరు మోహలు చల్లనోపఁబో నేను
మొగమోటఁ గొండెత్తినా మోచేఁ గాని
తెగువతో నీగుణాలు తిద్దలేఁబో నేను      ॥ అంద ॥

వొదిగి పానుపుమీఁద నుండేఁ గాని
చెదర నిన్నింత వచ్చి సేయలేఁబో నేను
పొదిగి శ్రీవేంకటేశ భోగించితి నన్ను
వెదకి నీ వెందుండినా విడువలేఁబో నేను   ॥ అంద ॥