Annitaa Jaanavu (అన్నిటా జాణవు)

అన్నిటా జాణవు నీవు అటువంటివాఁడవా
కన్నపనులకుఁ దారుకాణలేలయ్యా       ॥ పల్లవి॥

తెలిసె నీమాటలు తేటతెల్లమిగాను
చెలులెల్ల నాతోనుఁ జెప్పనప్పుడే
అలుకలన్నియుఁ దేరె నన్నిటా సంతోసమాయ
యెలమి నింతేసి యాస లేల పట్టేవయ్యా   ॥ అన్ని ॥

కంటిమి నీగుణములు కన్నుల పండుగగాను
యింటికి నీవే వచ్చి యెచ్చరించఁగా
జంటలైతి మిద్దరము చక్కనాయఁ బనులెల్ల
వంటుచేసి న్నునెంత నమ్మించేవయ్యా   ॥ అన్ని ॥

మెచ్చితి నీనేరుపులు మేనఁ బులకలు నిండ
కచ్చువెట్టి నన్ను గూడి కాఁగిలించంగా
మచ్చిక శ్రీవేంకటేశ మనసు లొక్కటులాయ
యిచ్చగించ నీ నిజాలు యెంతచెప్పేవయ్యా ॥ అన్ని ॥