Aakeku Neeku Delusu Noubhalesaa (ఆకెకు నీకు దెలుసు నౌభళేశా)

ఆకెకు నీకుఁ దెలుసు నౌభళేశా
యేకతాననే యరసి యెఱుఁగుకో రాదా     ॥ పల్లవి ॥

యెదురుఁ గొండలెక్కి యేటి కొల కే మమ్మ
అదిగో సొలసి మాటలాడీ నిన్ను
పొదిగి పొదిగి యట్టే బొమ్మల జంకించు కొంటా
తుదలేని వేడుకలఁ దొంగి చూచీని      ॥ ఆకెకు ॥

చల్లని మాకులనీడ సమదిష్టితో నీకు
వొల్లని ప్రియాలు చెప్పి వొరసీ నిన్ను
తెల్లమిగా సెలవులఁ దెగ నవ్వు నవ్వుకొంటా
పల్లదాన నీపైఁ బూబంతి వేసీని        ॥ ఆకెకు ॥

మిక్కుటపుఁ దమకము మించఁగా నీ తొడ యెక్కి
గక్కునఁ జన్నుల నొత్తి కలసీ నీతో
తక్కక యహోబలానఁ దగ శ్రీ వేంకటాద్రిని
వొక్కటై నిన్నుఁ బెండ్లాడి వొద్దికె చూపీని    ॥ ఆకెకు ॥