Addo Yekkadisuddi Antesi (అద్దో యెక్కడిసుద్ది అంతేసి)

అద్దో యెక్కడి సుద్ది అంతేసి కోపఁగలనా
గద్దించ నీతో నాకుఁ బెద్దరికమా       ॥ పల్లవి ॥

చెలఁగి నీవేమి చేసినాఁ జేసితివి గాక
చలములు సాదించ సరిదాననా
సెలవుల నవ్వేవు నీ చిత్తము కొలఁది గాక
మలసి నే మారునవ్వ మందెమేళమా    ॥ అద్దో ॥

కొచ్చి కొచ్చి నీ వెంత కొంగువట్టి తీసినాను
పచ్చిదేరఁ బెనఁగ కోపపుదాననా
యెచ్చరించి సారె సారె నిక్కువ లంటేవు నీవు
గచ్చుల నేనూ నొరయఁ గండ గర్వమా    ॥ అద్దో ॥

యిక్కువ శ్రీ వేంకటేశ యేలితివంటా నేను
నిక్కి యెమ్మె సేయ నీతో నీటుదాననా
మక్కువచేసి నన్ను మన్నించితివి రతుల
అక్కరతోఁ గొసరఁగ ఆసోదమా       ॥ అద్దో ॥