Amdariki Gala Chaale (అందరికి గల చాలే)

అందరికిఁ గల చాలే ఆఁడువారైన వారికి
కందువల ముందరెత్తు కనుఁగొనరే      ॥ పల్లవి ॥

చెలులాల మీ తోను చెప్పీ నంటే సిగ్గయీ
తలఁపులో నాఁపరావు తమకములు
వలరాజు బలములు వారించ పసగావు
తెలుసుకోరే మీరు తెగని నాకోరిక       ॥ అందరికి ॥

చేరి మీ మోము చూచితే సెలవుల నవ్వు వచ్చి
వూరకుండితే నిట్టూర్పు లుమ్మగిలీని
నీరు వంటిది వయసు నిప్పు వంటిది వలపు
తారుకాణించఁగ రాదు తలఁచుకోరే      ॥ అందరికి ॥

యెట్టని మీ రడిగితేఁ దొట్టీ నాలోని గుట్టు
పట్ట రావు వేడుక లుపచరించక
యిట్టే శ్రీ వేంకటేశుఁడింతలోనే నన్నుఁగూడె
చుట్టరిక మిఁక మీరే చూచుకొనరే       ॥ అందరికి ॥